MANILA, Philippines — Nagbabala si dating Senate President Juan Ponce Enrile sa magiging epekto ng global recession kung saan maaapektuhan ang mga overseas Filipino workers.
Ayon kay Enrile, kailangang palakasin ang mga pagkakataon sa ating bansa para sa mga OFW sakaling magkaroon ng global recession na magiging dahilan para sa kawalan ng trabaho.
“Magkakaroon ng pagbabawas ng mga trabaho sa Europa, Middle East at sa iba pang parte ng mundo natin dahil magkakaroon ng recession. [Bumabagal] ang mga ekonomiya ng mga bansa. Nagbabawas sila ng tao. Nagsasara sila,” sabi ni Enrile.
Ayon pa kay Enrile, ang mga mawawalan ng trabaho na OFW, ay tiyak na pauuwiin sa Pilipinas at ito anya ang problemang babagsak sa ating bansa na dapat paghandaan ng gobyerno para mayroon silang masilungan na trabaho.
Ito rin ang dahilan kaya isinusulong ni Enrile na mabuksan ang buong Pilipinas sa banyagang kapital para makalikha ng maraming trabaho para sa mga Filipino.
Ayon sa mga ekonomista, bumabagal ang ekonomiya ng Estados Unidos, Canada, mga bansa sa Europa at iba pa. Maaaring hudyat ito nang paparating na global recession.
source: philstar.com
Comments
